Faatasi ai ma vaega faatupu vevesi ua taufaamatau e tutuli ese i latou mai i o latou fale, e faitau afe Au Paia o Aso e Gata Ai na sosola ese mai Navu, o lo latou nofoaga e potopoto ai mo le fitu tausaga ua tuanai. I le mulimuli ai ia Polika Iaga ma le Korama a Aposetolo e Toasefululua, na latou malaga ai i sisifo e sopoia laufanua valevalenoa ma laugatasi, ma faalagolago i le Atua e saunia ai se nofoaga mo i latou i tua atu o tumutumu maualuga o Mauga Papa.
O le mauaina o se nofoaga fou ua na o se amataga o la latou tala. I la latou sailiga e auauna atu i le Atua ma fausia Siona, sa tauivi le Au Paia na faaaunuua ma faafitauli fou ma sauaga sili atu. Na galulue faatasi alii ma tamaitai lototoa e fatua'i ni nuu ia e mafai ai e tagata faamaoni ona potopoto e lata ane i malumalu ua fausiaina mo le mamalu o le Atua ma le togiolaina o e o loo soifua ma e ua maliliu. I le taimi lava e tasi, e faitau selau faifeautalai na faimalaga i laueleele mamao e valaaulia isi e o mai ia Keriso ma fesoasoani e fausia Siona.
Leai Se Lima Eleelea o le tusi lona lua i le Au Paia, o se tala fou, o le talafaasolopito e fa voluma O Le Ekalesia a Iesu Keriso o le Au Paia o Aso e Gata Ai. E televave lava, na suesueina ma le maelega, ma tusia i lalo o le taitaiga a le Au Peresitene Sili, ua faamatala mai e le Au Paia ni tala moni o le Au Paia o Aso e Gata Ai i le salafa o le lalolagi ma taliina ai le valaau a le Alii ia tusia le talafaasolopito "mo le lelei o le ekalesia, ma mo tupulaga fai aʼe" (Mataupu Faavae ma Feagaiga 69:8).
