Broken hearted si Carol nang unang magkrus ang mga landas nila ni Leandro 'Lian' De Marco.
Gwapo ito, matangkad at simpatiko. Kung hindi lang siya nito inuutusang lumayas agad sa tinitirhan niyang apartment na pag aari pala nito, marami pa sana siyang magagandang katangian na mapapansin sa lalaki. Hindi naging maganda ang unang pagtatagpo nila ng binata kaya ganon na lang ang pagtataka niya nang makisimpatya ito sa kanya nang mahuli niyang may kasamang ibang babae ang boyfriend niya.
Higit pa silang pinaglapit ng pagkakataon nang alukin siya nito ng isang espesyal na trabaho. Pumayag din itong makitira siya pansamantala kasama ang Lola at pamangkin niya sa bahay nito. Habang lumilipas ang mga araw, nahuhulog si Carol dito. Kaya naman masayang masaya siya nang ligawan siya nito at tanggapin niya ang pagmamahal nito. Pero isang araw, bigla na lang itong naglaho.
Pagkatapos ng halos dalawang taon, muli silang nagkita. Leandro has temporary amnesia. Nakahanda siyang gawin ang lahat para ipaalala sa lalaki ang nakaraan nila pero paano kung kasabay ng pagbabalik ng alaala ng binata ay ang pagbabalik din ng pagmamahal nito sa babaeng dahilan kung bakit sila pinaglapit noon ng tadhana?